"Ciuhui! Pudon ji a to n bel pest!", pensans bele plu dis alalongia.
Pra l cuncors de pastelné per "La Maratona dles Dolomites 2008" ova fat pea plu tlasses de uni scola. Per la scola elementeres fans nce nëus, la quinta tlas B, unic cherdei a ji ai 16 de mei a to l pest.
Sul viac ons tëut pea la mutans dla scola mesana de Urtijëi, che ova ënghe venciù. Ntan furné ciaculans y ciantans.
Ruei a Bulsan, sons jic n tòch a pe nfin che son ruei su tl ciastel Sigmundskron. Nia suënz ne fans mo stac te n vëir ciastel. Ce gran ciastel, ce lerch dlonch ora! Dedora à n fotograf fat n trëi fotgrafies y pona sons jic a scuté su la cunferënza. Giut alalongia ài rujenà dla Maratona dles Dolomites: l presidënt Michil Costa, l patron de cësa Reinhold Messner y autri.
Finalmënter ài scumencià a premie la tlasses. Sibe i mëndri sculeies de Cortina y nëus, che i majeri dla Val Badia y d'Urtijëi, duc à giapà n beliscimo pest: n viac a“Movieland” dlongia l lech dl Garda. Ce legrëza!
Do la cunferënza son jic mpue ncantëur tl ciastel. Te n tel ciampanil fovel figures dl Budda y te na ciavierna de biei cristai. N struf ons nce cialà sëura chi mures ora: ce bel che udan la valedes dl Adesc, dl Sarentin y dl Isarch, la zità de Bulsan, l Salten y l Renon, l'autostreda Mebo y i gran ruves. Ntëur la un ons giapà dl dut da maie, mo nce de bon crafons. Stanc y cuntënc sons inò piei de viers de cësa.
Chësc fova propi n bel dì de scola!
Alexandra