N valguni de nosc cumpanies de tlas à l pere, l'oma o n berba che fova da jëuni tla squadra naziunela de schi "azzurri". L se trata de Peter Runggaldier, Siegfried Kerschbaumer, Mauro Bernardi, Karla y Oscar Delago, Giorgio Callegari y Werner Perathoner.
Cater dis dan nosta garejedes de schi, pudejé y luesa i ons nviei a unì te scola. Bel mpont ies'i unic: Karla Delago, Oskar Delago y Siegfried Kerschbaumer. Ëi nës à cuntà drët dauleibon de si cariera sportiva. Karla à purtà a lascé udëi na gran copa che ëila ova venciù pra i campionac talians, propi scialdi na granda, y na bela! Siegfried à mustrà n bel diplom giatà ntlëuta dal nosc chemun y Oskar à mustrà de bela fotografies.

On dumandà a Karla Delago, l'oma de Natalie y anda de Nadia:
Ulà Ëis'a venciù la gran copa che ëis tëut pea? A Cerreto Laghi, l ann 1983, pra i Campionac Talians, tla combinata.
Ëis'a pudù fé pea pra la olimpiades? Sci, a Calgary, l ann 1988.
Ce sort de garejedes ëis'a fat pea? Ji ndrët (juissa).
Ciun ie pa l atlet tl sport dl sci alpin d'al didancuei che Ve plej de plu? Didier Cuche dla Svizra. Ël ie n atlet scialdi ghert y da talënt.

On dumandà a Oskar Delago, berba de Nadia y Nathalie:
Ciun purtoi ve savova pa l plu da temëi? L fova la garejeda a Kitzbühel.
Chi fova pa Vosc trainer? Viktor Senoner de Urtijëi.
Ciuna fova pa Vosta marca de schi? Mi marca de schi fova Rossignol.
Ulà Ve ëis'a fat dassënn mel? Sun un di purtoies plu riei dl mond, a Kitzbühel. Ouca! Iló me ei danz fat mel…!
Tan de bedaies ëis'a venciù? Zirca 30 te mi cariera.
Ëis'a fat garejedes de Copa dl Mond? Zirca 40, danter juissa, super-G y slalom lerch.
Ciun ie pa stat Vosc mieur resultat? Tla Copa dl Mond: n 10° post tla juissa a Wengen (Svizra).
Ciun ie pa l schiadeur che Ve plej de plu al didancuei? A mi me plej dassënn Bode Miller per si caracter da uleibon. Ël ie n atlet cumplet, l fej d'uni sort de sport drët bën!

On dumandà a Siegfried Kerschbaumer, pere de Samuel:
Sce pudessais fé pea na garejeda de Copa dl Mond, fajessais'a pea? Ie fajësse ben pea, sce fossi plu trainiert.
Ciun fova pa da pitl l purtoi che ais l plu gën? Chël fova l lift de Ti nëine, Dominik. Ferdinand Senoner nes lasciova for furné su debant.
Ve ëis'a n iede rot i schi? Sci sun l purtoi dla Saslonch m'ei, doi dis ndolauter, rot i schi. L trainer m'à pona dit che dësse permò fé pea n auter ann la garejedes de Copa dl Mond.
Tan de garejedes ëis´a bele venciù? Nia truepes: danter 30 y 40.
Ëis'a fat na garejeda de Copa dl Mond? Sci, n grum. Mi mieur resultat te Copa dl Mond ie stat n 6°post.
Tan de juisses ëis'a bele fat? Dessegur ntëur n 50, o de plu.
Tan de bedaies de or ëis'a venciù? L ann 1980 ei venciù la Copa Europa totale y l ann 1982 la bedaia d'or pra i Campionac Mundiei Militari. Son deventà plu iedesc campion talian te combinata y juissa.