N ucajion dla 20a edizion dla gran manifestazion sportiva "Maratona dla Dolomites" iel unì scrit ora n cuncors de dessëni, ulache la scoles dla valedes ladines fova nviedes a to pert. "Depenjon la stredes" fova l titul dl cuncors cun i culëures sciche tema zentrel. I dessënies unirà pona tachei ora su per i jëufes ntëur l Sela y abelirà a chësta maniera la manifestazion.
Bën 6 tlasses de nosta scola a tëut su chësc nvit: la doi primes, la trëi segondes y la cuarta. Duc se a pruà dassënn a realisé si ideies cun gran mpëni y fantasia sun n placat bën 4m lonch. De ndut iel unì dat ju 64 dessënies. De duc chisc a la giuria crì ora l dessëni dla 1B dla Scola elementera de Sëlva minan che chësc fova l plu originel y creatif. Nsci a i 14 pitli sculeis cun doi maestres pedù furné a Bulsan tl Thuniversum, ulache, n ucajion dla cunferënza stampa per la prejentazion dla Maratona, ti iel unì sëurandat l prim pest. Granda fova sambën la legrëza canche i a audì che pra chësc prim pest se tratovel de n viac a Gardaland. Nsci ons pedù fé nosta jita de mei a Gardaland. Nce sce l tëmp ne a nia propi judà pea se a mpo duc devertì dassënn y ne desmincerà nia tan prësc chësc bel di. Duc i sculeis che a fat pea l cuncors a giapà na bela "maglietta" n lecord dla manifestazion. A duc i dessënies pon ji a ti cialé sun internet sot a www.maratona.it