La tradiziunela festa dl sport ie stata n sada ai 27 de mei tl ciamp dal sport Mulin da Coi. Passa 300 sculeis dla scoles primeres de Sëlva y S. Cristina à purtà ora cun mpëni y pascion gares de atletica y juesc da mesa la nuef a mesa la dodesc danmesdi. La pèrt plu agonistica revardova i 60 m de sauté, l turnoi dl juech al palé y tré tla corda; plu sul fé damat fova l juech de fertuna, la proa de cuordinazion y tré tl cëst. L spirt sportif y l tenì adum an pudù udëi pra duc i partezipanc; uni mes’ ëura mudova jù i juesc, perchël iel stat nteressant y da druch dal scumenciamënt ala fin. La manifestazion ie fineda via cun l sauté 8 x 50 m danter na selezion de sculeis, de genitores y de maestri. Chëst’ ann à venciù saurì i genitores, ma aspitede mé n auter ann!