Son pona jic a ti cialé ala „Gherdëina Lat“, ulache tl museo dl lat ti iel unì mustrà ai sculeies te na maniera scialdi nteressanta y moderna cie che la vaces maia, coche cëla ora l magon de n tel tier, ce massaria che l paur adurvova zacan...Tan che deguni ne n’ova mo mei udù na pënia o n mëudl dal smauz. Ma l avenimënt dl di fova bën pudëi nstësc purvé a mëujer! Drët bel ti a nce sapù a cialé coche i fajova ciajuel, che on nce pedù ciarcë dopro.

N auter di sons jic te Curzlon a ti cialé ala stala y al tublà. L paur Roman nes a cuntà coche cëla ora n di sun n luech da paur y duc i lëures che ie da fé. Daldò nes al mustrà coche l vën mëut aldidancuei y ulache ruà pona l lat. Do ti avëi cialà al gran tublà a i mutons pedù jì te stala a ti cialé al bestiam. L plu bel ti a bën sapù a pudëi smilé n tel pitl aniel permò nasciù!

Mo n iëde sons pona jic ora de scola per mparé a cunëscer na tradizion che ie bel plan tl lëur de unì desminceda: anda Stina dl Valin se ova metù a desposizion per ti mustré ai mutons coche n fajova zacan a fé jufa. Furnida cun si bel guant da paur ala cuet sun n fuech alalergia na bela gran jufa. Ntan che l smauz se sciaudova te fanucia ala metù n uef batù ora sëura la jufa via. L mumënt plu de marueia fova canche la flama ie suateda ite te fanucia y anda Stina a pona smauzà la jufa. Chësc ne n’ova i mutons mo mei udù! „Cëla, sën jetela ora l fuech!“ dijova n tel mut belau mpue sprigulà. Drët bel ti a sapù ai mutons pudëi se cufé ntëur fana ite y se maië la jufa. L miëur fova bën chël bon puestl sëuravia, ma vel’ un se spazova nce per abiné la raspa sotite.

Anda Stina se ova monce njenià ca na bona tëurta da nida che la majera pert di mutons ne cunesciova nia. A duc ti ala sapuda drët bona. Sun na mëisa fovel nce da garat pan de siëla, ciajuel y n valgun toc de smauz da paur cun de biei dessënies sëuravia.
Cun chësta scumenciadives ons ulù ti fé capì ai mutons tan de mpurtanza che ie na alimentazion sana, ma nce ce valor che à l lëur da paur y la bela tradizions da zacan.