N safari tl mond di tieres

Chi ne à pa nia ueia de fé n viac y mparé a cunëscer l mond di tieres? L ie segur n grum de Vo che uëssa savëi zeche deplu sun elefonc, zebras y lions. O magari udëi na lores, n valtoi, n pinguin! Ntan chësc instà puderà i sculeies dla scola elementera y dla scola mesana de S. Crestina fé n safari tres na giungla de libri sun i tieres. "Bibliofestival 2002" à inò inuem l’azion de liejer metuda a jì dala bibliotech "Tresl Gruber" y l tema da chëst ann ie l mond di tieres.
 
Do l gran suzes de l ann passà vn nce chëst ann inò metù a jì l "Bibliofestival 2002". Da mez juni inant po i sculeies inò se mpresté òra y liejer na mont de libri sun l argumënt di tieres: stories de tieres da tlo y da oradecà, libri de fotografies sun i tieres de dut l mont, cuntedes, liejëndes y nfurmazions sun i tieres.

Pità vëniel passa 150 libri per ladin, tudësch y talian. Uniun che fej pea giapa n pitl pass, ulache l pò scrì ite i libri che l se à mprestà ora. Y chëi che à liet cater o plu libri nchin ai 22 de setëmber unirà nviëi ala gran festa dl „Bibliofestival 2002".
Chësta festa sarà de utober y nce chëst’ann ne mancerà nia na blota scincunda per chëi che arà mperstà ora i cater libri.

Perchël se paiel a unì bele ti proscimi dis te bibliotech a se crì ora n liber nteressant. Chëi che uel po nce fé n bel dessëni di tieres che ti à plajù de plu. Chisc dessënies sarà pona da udëi pra la festa ala fin dla manifestazion.

L „Bibliofestival 2002" vën metù a jì adum cun la scola elementera y la scola mesana. N bel cuntribut finanziel vën da pert dl Cunsëi de furmazion y dl Chemun de S. Crestina.

Chiche ëssa mo vel dumanda po cherdé su la bibliotech „Tresl Gruber" (0471/790016).