L ann 2003 ie unì proclamà dala UNO "Ann nternaziunel dla ega dëucia". Sëura dut l mond se dajeran perch l jù plu sot cun la tematica dl’ ega. Nce tlo da nëus ie bele y unirà mo metù a jì n valguna manifestazions che arà da nfé cun l’ega. Nteressanta ie segur la idea dla bibliotech Tresl Gruber de S.Crestina de mëter a jì l bibliofestival sota la tematica dl ega.

Chëst ann vën l bibliofestival bele metù a jì per l terzo iëde ndolauter. Tres l bibliofestival ti vën pità ala scueleies y ai sculeis dla scola elementera y mesana la ucajion de liejer nce ntan l instà ngrum de libri nteressanc. Y coche l se à desmustrà bele ntan i ani passei, vën chësta scumenciadiva tëuta su de bon uedl dai sculeies de S. Crestina: Marë l ann passà a fat pea 153 sculeies.

"Ngrum de gotes de ega" ie l tema dl bibliofestival 2003. Duc i libri arà sambën da nfé cun l ega. Ce sort de tieres y de plantes vif pa tl ega? Percie ne va pa na berca nia sot? Fova pa i pirac davëira tan da temëi? Na resposta a chësta dumandes y mo ngrum de autra stories sarà da liejer ti passa 150 libri nueves, cumprei aposta per chësta azion y che pieta n devertimënt segurà per dut l instà.

L bibliofestival 2003 pea via n dumënia ai 15 de juni. Uniun che fej pea giapa nce chëst ann n pitl pass, ulache l pò scrì ite i libri che l se à mprestà ora. Y chëi che à liet cater o plu libri nchin ai 22 de setëmber unirà nviëi ala festa dl bibliofestival 2003.

Coche n po se npensé tol la urganisazion de na tel scumenciadiva scialdi lëur y l sce l bibliofestival ie nchinamò tan garatà po ie chësc me l merit dla bona cunlaurazion danter i ulenteres che lëura te bibliotech y la maestres y i maestri dla scola elementera y mesana. La pert finanziela vën curida dal Chemun, dala Cassa Raiffeisen de Sëlva y dal Cunsëi de furmazion de S. Crestina.