187, 110, 87, 521. No, ne dajon nia i numri. Chisc ie i dac dl bibliofestival 2001 metù a jì dala bibliotech S. Crestina. 187 ie i sculeies che va tla scola elementera y mesana de S. Crestina.

Bën 110 de chisc à fat pea ntan l instà pra l bibliofestival 2001. L fin de chësta azion fova chël de ti fé unì la ueia de liejer ala mutans y ai mutons nce ntan la feries de instà. Cun suzes: de ndut iel unì mprestà ora y liet 521 libri! 87 sculeies (chël uel di belau mec!) à liet 4 o plu libri: ad ëi ti iel n vënerdi dl’ ena passeda unì fat na gran festa.

La festa à pità velch per duc y dal gran aplaus y dala legrëza scrita timusc di pitli (y nce de vel grant) possen dì, che na tel festa per i mutons ne fova bele giut nia plu stata fata. „La bibliotech à cialà de mëter la mutans y i mutons tl zenter de chësta festa ti pitan zeche de nteressant y da se devertì y chësc à scialdi plajù“, dij l presidënt dla bibliotech, dr. Alexander Bauer.