Santa Crestina

zacan		aldidancuei

S. Crestina ie a 1428 m sëura l livel dl mer y cumpëida prësciapuech 1760 abitanc. Plu dl 80 % dla populazion ie de rujeneda ladina. Cun i chemuns de Sëlva y Urtijëi ie S. Crestina l paravis da jì a spaz y cui schi tl cuer dla Dolomites de Südtirol.
Cun l turism ie nce l lëur da paur y l artejanat seves dl'economia dl luech. Na gran tradizion à dantaldut l ziplé tl lën, cunesciù lonc y lerch sëura i cunfins dla provinzia ora.
l cialé ora dl luech ie caraterisà dala dlieja de pluania, da udëi bele da dalonc cun si bel ciampanil gotich. Ntëur la dlieja via ie nce la nfrastrutures de majera mpurtanza per la cultura (scola elementera y mesana, scolina, bibliotech, sala dl teater y palestra) coche nce la cësa de chemun cun si ufizes y chël dla lia dl turism.
L nridlamënt dla tëmples da pert da surëdl mët man plucheauter do l 11. y l 12. centené. Bele tl 12. centené vën numineda na capela cunsacreda a S. Crestina. Tl ann 1418 devënta S. Crestina sënta dla "Curazia Gherdëina" y resta per truep ani l zenter de cult dla valeda. L'economia scumëncia a crëscer, ma plutosc bel plan, cun l mëter man dl turism tla segonda mesaria dl 19. centené. Do la doi viëres mundieles devënta S. Crestina n luech de turism drët cunesciù cun si 2800 liec da fité via, che fej ora prësciapuech 300.000 nuetes al ann.
Cun lezitënza y gran mpëni tl lëur ie la populazion de S. Crestina ruveda a se nsté bëndebo bën.