La Scola Mesana de S. Crestina

  

La scola mesana de S. Crestina ie unida metuda su dl 1973. Nce sce l fova bele doi scoles mesanes bëndebo daujin, ne fovel nia mesun de mandé i sculeies iló, pervia de si gran cumpëida. Per merit dl ambolt da ntlëuta, anda Gioachina Mussner, che ova scialdi a cuer la scola y l'educazion di mutons y di jëuni, oven pudù mëter su chësta istituzion culturela tan de mpurtanza per la cumenanza dl luech.
Da ntlëuta nca à ntëur 600 sculeies pudù unì te chësta scola y 563 de chisc à arjont l diplom de scola mesana.

L ëurar dla scola mesana fej ora 36 ëura al'ena. Pra ladin, coche rujeneda dl'oma (2 ëura al'ena), vënel nsenià per tudësch y talian, y mo 2 ëura de nglëisc al'ena leprò.
La carateristica particulera dla scola ladina ie l nseniamënt paritetich, chël uel dì che l vën nsenià mez l tëmp per tudësch y l auter mez per talian. L ti vën dat na gran mpurtanza al nseniamënt dla rujenedes.
L sistem paritetich se à desmustrà drët de utl te chisc ultimi 50 ani, i sculeies de nosta scoles mesanes po' jì zënza de gran deficulteies sibe te scoles autes tudësces che talianes.